Hugot Bisdak 4

 Ang padayon nga pag-iswag sa unahan ang usa ka pamaagis' kinabuhi sa pagpakabuhi. 

Apan ang pagbaton ug nagkadaiyang pagtulun-an niini, hikaplaga'g makat-unan pinaagis' pagbalik sa mga nangagi. 

#God_is_Love 💝

Usa kita mumugna ug desisyon sa usa ka butang o panghitabo sa'tong kinabuhi. 

Kitao'g hinuktukan ta usa ang litrato o imahe sa umaabot niini. 

Kung sa imong paminaw ug pagbansay-bansay maayo'g makatarunganon kini. 

Sa walay pagduha-duha, pagtigom ug sakting kusog ug kaisog ug ipadayon ang pagbuhat niini. 

Apan kung kini dili makatarungano'g supak sa imong kabubut-on, ayaw ipadayon ang pagbuhat niini kay sayod man kitang ang pagbasol naa gyud permi sa ulahi.

#God_is_Love 💝

Ang mga pagsuway ug suliran sa'tong kinabuhi samas' usa ka sugal.

Adunay panaho'g higayon nga makabaton ug kadauga'g kapildihan. 

Apan ang pagkapilde'g kapakyasan nga atong maagian, kuhaan ta kini'g pagtulun-an. 

Atong timbang-timbangon ug hinuktukan, arun sa sunod pa nga mga adlaw ang pagtulun-ang imong nakat-unan. 

Mao niya'y mamahimo nimong tulay ug biseklita sa pagbaton ug kalampusa'g kadaugan.

#God_is_Love 💝

Kinabuhing gipangugata'g kalaay, 

Namunua'g nanaho'g pagmahay. 

Nananga'g nanalingsing ug mga pagsuway. 

Namunga'g pagtulun-an, nga sa panumduma'g dughan mibanga'g mikutay. 

#God_is_Love 💝

Ang dagan niing huna-huna'g dughan, 

Lain-lain gyud ug sangputanan.

#God_is_Love 💝

Oktubre tres, adlaw nga Sabado, 

Pagahimayao'g pasalamatan ta ang Ginoo. 

Sa tanang panabang niya'g kaayo, 

Ug sa tanang himaya'g grasyang gidalit niya kanato. 

Mapasigarbuhon ta kining ipasundayag pinaagis' tiunay nga pagtahod ug pag-alagad kaniya'g pag-ampo.

#God_is_Love 💝

Matag-irog sa taknaan, dunay mga nagkadaiyang panghitabong atong naagia'g maagian nga dili ta hikalikyan. 

Maong sa tanang lumulupyo sa LUZON, VISAYAS, MINDANAO ug sa tibuok KALIBUTAN. 

Gipanghinaot ko sa makadaghan, nga MAGMAAMPINGON kitang tanan.

Magmaigmaton kita ilabi nas' mikuyanap nga pandemyang milusno sa di mahugang-dagom nga kinabuhi'g panginabuhian. 

#God_is_Love 💝

Unta manugad kas' uwan, 

Nga kanako, magsige'g paramdam. 

#God_is_Love 💝

Kung papilion ko'g usa ka butang, arun sa pagpamulong ning gibatyag nga balatian. 

Sa walay pagduha-duha'g pagalipod-lipod, pilion ko ang makusog nga bundak sa uwan. 

Kay sama NIINI, puwede mong likya'g pagapandungan. 

Apan di mo gyud kini kayang pugngan! 

#God_is_Love 💝

Ang pagmahal ko diha kanimo, mura'g tinulos' uwan. 

Sa taknang ikaw gani matud-an, manuhup-tuhop kinis' kaugatan mo'g dughan! 

#God_is_Love 💝

Giuwan ako sa kasuwerte, 

Sukad nga nahimo kang kabahin sa'kong kinabuhi. 

#God_is_Love 💝

Ang kinabuhi ko, samas' nahubsang sapa. 

Niundang sa pag-agas, pero natubda'g nahimong tubig-baha, 

Sukad nga nakaila teka.

#God_is_Love 💝

Dili man ikaw ang babaye nga kaniadto, maoy akong Gidamgo. 

Apan karun, ikaw ang bugtong binuhat nga maoy naghimo ug naghatag-katumanan sa'kong mga damgo. 

#God_is_Love 💝

Bisan ug mag-away pata, 

Ang giumol nga saad natong duha;

Tumano'g dili nato kalimtan bisan pa'g magkadiunsa pa. 

Kay mao kini naglimin sa tigbayon, sa gipanday tang duha ka gugma.

#God_is_Love 💝

Sa tanang minugnas' gamhana'g balaan tang Ginoo,

Pinakabulahan sa tanan ang mga tawo. 

Kay gitugyanan kita'g abilidad, sa pagpamulong sa tanan tang gusto. 

Ug gahom sa paghuna-huna'g paghimo'g desisyon sa kinabuhi, arun ang kaugmaon ta, magbunga'g maayo.

#God_is_Love 💝

Ang usa ka sitwasyon, bisa'g unsa pa kalisud, 

Kinahanglan kining atubangon nga punos' kaisog. 

Kung ang gabahang suliran kanato muanod, 

Ang atong Ginoo ang kanato, maoy manalipod.

#God_is_Love 💝

Sugdan ta ang atong kabuntagon, 

Sa matam-is ug mapanggayumang pahiyum. 

Ang mga masulub-on, atong pagadanihon, 

Sa paghudyaka taliwas' kalisud sa panahon. 

Kay ang pagkamalipayon, yabi o susi arun magmalampuson,

Ang nagkadaiya tang mga buluhaton. 

#God_is_Love 💝

Ang tanang binuhat niining kalibutan, 

Dunay gisubay nga tagsa-tagsa ka mga dalan. 

Hinaot nga musubay niini ang tanan, 

Ug dili magliku-liko'g mutipas sa sayop nga agianan. 

Kay ang maong matang sa dalang giaandam sa katawhan, 

Himaya'g kalipay nga walay sama ang naghulat ug sangputan niini sa unahan.

#God_is_Love 💝

Ang pagmata sayo sa kabuntagon, 

Unang grasyang gihatag ug nadawat ta sa atong Ginoong makagagahom. 

Kaniya, ipakita ta ang atong pagkamapasalamaton. 

Pinaagis' pagbuhat sa nagkadaiyang butang nga nakauyo'g dili supak sa iyang kagustuha'g kabubut-on.

#God_is_Love 💝

Sa tanang panaho'g higayon, di ta dapat mukumpiyansa. 

Kay hilabihan ka lisud ang dagans' kinabuhi, mahitungod sa mikuyanap nga pandemya! 

#GODISLOVE 💝

Ang kahoy samtang linghod pa'g ugat, 

Sayo'g dali rang ibton kay ang gamot, nagsugod palang sa pagkuyanap.

#God_is_Love 💝

Ang baol o uma samtang gamay pa'g hinlo o hawan, 

Sayo'g dali rang undangan kung kapuyo'g dili naka ganahan. 

#God_is_Love 💝

Ang usa ka sayop samtang wala pa nidako'g midaghan, 

Sayo'g dali pa kining tul-iron kung ganahan ka'g kabag-uhan.

#God_is_Love 💝

Ang samad samtang wala pa midako'g midandan, 

Sayo'g dali pa kining maayo kung imong tambalan. 

#God_is_Love 💝

Ang usa butang samtang wala pa nakadako'g nakalawom ug maayo, 

Sayo'g dali pa kining undango'g kalimtan, arun dili makapadugos' balatians' usa ka tawo.

#God_is_Love 💝

Ampingi'g ayaw pasagdi imong kaugalingon. 

Ayaw'g kalimti ang pagkaons' pamahaw, paniudto'g panihapon. 

Pagpabilin sa imong pagkamaampingon, 

Kay lawas ray atong puhunan, sa tanang panaho'g higayon! 

#God_is_Love 💝

Ang panahon nga uwan ug init, 

Segunda'g manifestasyon sa kalipay'g kasakit.

Sa tagsa-tagsa ta ka kinabuhi, kini mudat-og ma'g muipit. 

KANIYA, di kita magduha-duha sa pagpangayo'g tabang ug pagsampit. 

#God_is_Love 💝

Kung ang sapa nga gibaha, dunay pagkib-aw. 

Ang pagtaob sa kadagatan, anaa usay paghunas nga musimaw'g mupatigbabaw. 

Sama usab niini ang gipas-an-pas-an tang mga suliran. 

Malisud o masayon, mabug-at man o magaan. 

Duna g'yud kini, nakatagana nga igong kasulbaran. 

Dili kita angayang magpadala sa gibating kabalaka'g kahuyang.

#God_is_Love 💝

Dili naman ka namo magakos ug magunitan, apan kanunay kang anaa sulod niining among mga dughan.

Dili naman ka namo makit-an, apan ang imong katahom magpabiling lab-as niining among mga panumduman! 

#God_is_Love 💝

Kay lagi ang nagkadaiyang panghitabo dili nato hikalikyan, maong magpabilin kitang malig-o'g maisog sa tanang kahigayunan!  

#God_is_Love 💝

Ang bungang nahinog sa iyang punuan, lauming ang katam-is niini sakto'g kanimo makapahinam! 

#God_is_Love 💝  

Bisan pa'g kini sayop ug ginadili, wala kitay mahimo kung magpaulipon kitas' atong gibati! 

#God_is_Love 💝 

Mamahimo akong makabaton ug kasaypanan, sa mataggutlo niining taknaan. 

Maong ang imong paggiya'g pagsabot, kanunay kung gikinahanglan! 

#God_is_Love 💝 

Usahay di nako kalikyan ang mamahimong garboso, apan teman-e kung sayop ko di gyud ko magduha-duha sa pagpangayo'g pasaylo! 

#God_is_Love 💝 

Lingin ug nagtuyok ang kalibutan, hinaot nga ang nahimo'g mahimo kong kalapasan;

Mamahimo niyang lig-ong pagtulun-an nga akong mahimong hinagiban sa pagpadayon nakos' unahan! 

#God_is_Love 💝 

Kung mahitungod sa'kong nabuhat, mamahimo akong kataw-anan.

Bisan kanus-a dili gyud ko na siya igsapayan.

Kay kini pagbuot dili sa'kong panumduman, ug hinuon sa'kong dughan!

#God_is_Love 💝

"Wala nay bahanding mas bilinhon pa, sa bulawanong kinabuhing gigasa napod  niyas' imoha!"

#God_is_Love 💝

Ang kinabuhi hilabihan ka bilinhon, dili kini butang nga kung imong usikan mamahimo pang paliton.

Maong kinahanglan kining panggao'g atemanon sa tanang higayon!

#God_is_Love 💝