Kagawasan

 Kagawasan

    _Teofilo S. Valicuatro Jr. 

Bahanding habilin sa libu-kalibuan tang mga "bayani", 

Gikalasa'g singot, dugo'g patung-patong nga kinabuhi;

Niining higayuna, kita mao'y lig-ong saksi;

Ug mao'y labing,  nakapahimulos ug maayo niini! 

Sa dihang ang banderas' atong nasod, giisa'g gikaway-kaway. 

Kini usa ka samin ug lig-ong timailhan, 

Nga ang kagawasan, sa kahingpitan, Atong nakab-ot, nagakos ug natagamtaman. 

Busa sa tanang Maharlikano'g Maharlikana, 

Kalipay'g pagsadya, pagasaluhan ta. 

Bisan pas' pag-ulbo sa delikado'g makamatayng' krisis karung panahuna. 

Gahinan ta kini'g hamubong takna, sa pagdalit ug pagpasalamat ug pagsadya! 

Itisok tas' tagsa-tagsa ta ka panumduman, 

Ang pagpasigarbos' nasinating kagawasan. 

Kay usa kinis' matang sa pagkabilinhong butang, 

Nga di jud kahiptupngan sa bisan unsang bulawan! 

Nahimo man kitang binilanggo, sa tagsa-tagsa ta ka panimalay, 

Tungods' gipakigbatukang krisis nga dili makit-an. 

Isalig ta's labaw'ng makagagahom ang tanan, 

Kay KANIYA, duna kita'y igong "KAGAWASAN" sa Pag-ampo, Pagdayeg, Pangayo'g Giya ug Panabang! 

Kay siya ang bugtong tang dangpanan, 

Taliwala sa kalisud ug kaharuhay nga nasinatian ta'g masinatian. 

Kaniya wala kita'y angayng' kahadluka'g kabalak-an, 

Kay Siya mao'y sinugdanan, Siya gihapon ang katapusan! 

Siya lamang ang nasayod sa tanan, 

Ang kagustuhan Niya mao'y masunod ug matuman. 

Paghimos' maayong buluhatan atong ipatigbabaw, 

Arun kita iyang kahimut-an,  tabanga'g dili pasagdan! 

#Bulahan ug Mabungahong Adlaws' Kagawasan 

#GOD IS LOVE.