TULA PARA SA'YO AKING SINTA

“Tula Para Sa’yo Aking Sinta”

ni: Olifoet S. Ortaucilav Jr.

Mahalimuyak na ngiti ng araw

Bukod-tanging tinutura’y ikaw

Sa naidlip na pagsinta’y  uhaw na uhaw

Pagsintang walang halo’t tanging sa’ iyo’y  nakahalaw

Tatlong masukal na kabundukan

Sama-sama nating  tinahak, tinibag at napagtagumpayan

Damhin mo’t sa’yo’y aking ituturan

Oktubre, Disyembre’t Enerong handog ay kagalakan

Distansiya ma’y namagitan sa’ting dal’wa

Gabundok na balakid, hamon, suliranin, ni temtasyo’y ‘di makagigiba

Pagkat kapuwa puso nati’y binigkis ng Diyos Ama

Gamit ang kapangyarihan ng pananampalataya

Tunay ngang palaso ni kupido’y may angking lasong nakahahalina

Pagkat sa bawat pananahong dadalaw ka sa’king gunita

Puso animo’y payaso nagtatampisaw’t nagpakalunod sa kalautan ng ligaya

Ligayang ikaw lang aking irog ang nakapagpadarama

Sadyang napakalalim man ng mga imahe, simbolismo’t tayutay

Pero ‘di nito kayang higitan ang pag-ibig na sa’yo’y iniaalay

Kapara’y ngiti ng haring araw sa bukang liwayway

Kung ‘di mo tatantuhin, ‘di mo masisisid ang halaga nitong taglay

Sa mapaglingap mong mga kamay

Araw-araw puso ko, sa galak ay naghuhumiyaw

Na animoy hamog ng mapamugpog na ulan

Sa mala-gintong sisidla’y patuloy na umaapaw

Sa pagtatapos ng tula kong ‘to

Subukang iukit at ipinta sa puso’t isipan mo

Na kahit pagbabaliktarin man ang sansinukubang ito

Wala ninumang makahalili sa’yo sa loob ng puso ko

# TO GOD BE THE GLORY

# GOD IS GOOD ALL THE TIME

# GOD IS LOVE