"Magmalipayon Ka Lang!"

 "Bahala'g Tungod sa Kasakit Ako ang Mapukan, Magmalipayon Ka Lang"

      _Teofilo Valicuatro Jr. 

I. Walay tarung katulog matagkaru'g unya,

Naghoyhoy ang abaga, nagloyloy ang mga mata;

Nahumol sa kasubo'g nakabsans' mga luha;

Ang kasakit, makaya rama'g maaguwanta;

Apan, hangtod kanus-a man intawon kini mubiya? 

II. Ang lig-ong paglaom, sa tubig nahisuwat

Kalipayng' hilabihan, naghinay-hinay'g kapapas

Ang gibating sakit, kanunayng' nagapangwakwak

Dughan daw sininang nag-anam-anam ug kagusbat!

III. Ang kalipay'g kasakit, nahimong magtiayon,

Ang kaharuhay'g kalisud, nahimo usang mag-igsuon;

Usahay, kini makasuya kung huna-hunaon;

Makapasubo usab kung pamalandungon! 

IV. Ang prangkas' kapalaran, di kaduwa-duwaan,

Kinahanglan kining baruga'g pagaandaman;

Kay di kitas' Nostra Damos, nga kamaong mutag-an;

Kung unsay posibleng mahitabo sa'tong unahan! 

V. Dili sayon ang desisyong akong namugna,

Ang mubuhi'g mubiya kaniya, di usa ka duwa-duwa;

Apan kining tanan paras' kaugalingong kalipay niya;

Maong sakit man, makaya ra ko ni'g maaguwanta!

VI. Ang nagkagutay-gutayng' pagbati lisud tahiun

Kung mamahimo lang matapakan, sa walay pagduha-duha, ako gyung buhaton!

Apan katungod niyang magmalipayo'g magmalinawon;

Maong kinasing-kasing kong gerespeto ang iyahang desisyon! 

VII. Wala koy gahom arun sa pagbalik sa mga nangagi,

Labi nas' paghimong posible, sa pulong nga imposible;

Apan gipanghinaot kong magmalipayon siya permi;

Arun makatabang ko niya, bisa'g sa ingun aning paagi!

VIII. Mas maayo pang sakit samad kaysa sa dughan, 

Kay ang samad dali ra mawagtang, apan ang naulhi, muluntad ug dugay.

Apan kung unsa man kini kasakit, di ko igsapayan,

Magmalipayon lang siya, igo na kaayo ang tanan! 

IX. Sa tinud-anay lang ang kasakit wa ko gikahadlukan,

Nahadlok lang kong basin di nani mubiya'g kanako kanunayng' magauban.

Kay ang kalipay niya, ako usab nga kalipay,

Bahala'g tungod sa kasakit, ang akong kaugalingon maghinay-hinay sa pagkapukan!

X. Nagmadag-umon ang langit ko sa pagkakarun, 

Nagmangitngiton usab ang akong kagabhiun;

Ang banag-banag gikan sa mahal kong bituon;

Daw mitsang nahutda'g gas nga nag-anam-anam ug kaanum-om!

XI. Ang dalang akong gilakwan, sa kahayag napagngan,

Kay ang sulong akong gigunitan, kanako nawagtang! 

Mahitumpawak man ako sa tumang kaalautan,

Banlason man akos' baha sa mga kapakyasan;

Dili ko kini igsapayan, basta magmalipayon ka lang!

XII. Ang kinabuhi usa ka hataas nga panaw,

Ug nagsubay kitas' nagsanga-sangang dalan;

Walay nasayod sa husto niining pagapadulngan;

Ug hilabi ng wala kitay salabutan sa posible niining dangpanan!

XIII. Di ko ikaw kapugngan, sa dalang imong napilia'g mapilian;

Maong gipanghinaot kong maghinay-hinay kas' imong pagalakwan.

Di ko man ikaw padayon nga maubanan,

Ang ikahangyo ko lang, "Pag-amping sa Kanunay!"

XIV. Kung di naman gani magkatakdo ang duha ta ka dalan,

Nagpabili'g magpabilin kang nagtikaw-tikaw niining panumduman ko'g dughan! 

Ang matuod nga rason maong ikaw akong gibuhian,

Arun tugyanan kas' gitinguha mong kalipay! 

#God_is_Love 💝